Rev 4 | KYG | STEP | Ani gemo afite'na agovana koku'napi kitamo naulagale'mo yaki male'nige'na age'nove. Hogote'na afi'nogeno pikuli hu'nageno age aigekana agufa gefati'mo naha paino'ae'mo, Manile'mo haikege'nao. Henaga'amo afole aisiya kava'mo ali'na kavelino, huno naha pai'niye.

Revelation of John 4

Koku'napi Gotitefe'mo mono nehaya kavafe'mo hu'niya gemae

1 Ani gemo afite'na agovana koku'napi kitamo naulagale'mo yaki male'nige'na age'nove. Hogote'na afi'nogeno pikuli hu'nageno age aigekana agufa gefati'mo naha paino'ae'mo, Manile'mo haikege'nao. Henaga'amo afole aisiya kava'mo ali'na kavelino, huno naha pai'niye. 2 Malage hu'na Goti Auneme'afi'mo mai'ne'nae'mo naune kava'mo hu'na agovana mago vekamo koku'napi'mo fai mai'neno yagaino ne'apateya siate'mo mai'nige'na age'nove. 3 Fai mai'niya vekafati'mo mago yafa'mo agi'amo yasipa yafa'mo alu agufa alu agufamo kalifa yafakana huno haesa yafa'mo agi'amo koniliyani yafakana huno alave alave hu'niye. Mago fugi'na'mo'a yafa'mo agi'amo emalolimo'a hegafatalili yafakana huno hane'nigeno fugi'na'mo'a siate'mo aino ku ai'niye. 4 Tueti fo'a vaya'mogi yagai'a apatesayafe'mo siamo'a faino ku ai'nige'a tueti fo'a vayatama vaya'mo ani siate'mo fai mai'nae. Yaveyave kukenamo vai'a alite'a apakenopale'mo goli yafateti'mo alo hu male'naya kakolitamo kame hu'a ae'a ne'apakasaya vaya'mogi ne'malaya agufa kakolitamo ali'a male'a ali'nae. 5 Yagaino ne'apateya vekamo sia'afati'mo hafosamo hai'nigeno alino alave alave huteno alopa agemo ai'nigeno hakalu hakalu hu'nige'na age'nove. Yagaino ne'apateya vekamo sia'amo aulagaleti'mo seveni'a kani'amo ae'niye. Ani seveni'a kani'amo hane'niya kava huno Goti Auneme'amo'mo seveni'a himamu'amo hane'niye. 6 Yagaino ne'apateya vekamo sia aulagale'mo mago ani kotu'mo'a aeno ha le'nige'a ne'agaya kalasigana huno hane'niye. Lole'e lole'e vaya'mogi apaulaga'e apakamelaga'e'mo asole apaulagamo hane'niya vaya'mogi yagaino ne'apateya vekamo sia'ale'mo fai'a ku ai'a ate'nae. 7 Hogote vekamo laiyonigana huno mai'nigeno napa tu vekamo ve pulumakagana huno mai'nigeno napa tali vekamo augosamo'mo ve kanomo augosagana huno hane'nigeno napa fo vekamo halelitata nehiya hilo namagana huno mai'niye. 8 Lole'e lole'e vaya'mogimo sigisi'a hapakumo hane'nigeno muki apakufa'afilagamo apaulagamo hane'niye. Muki afina'mo feluga'e hani'ilaga'e'mo mai'a falu osu'a mai'ne'a hu'apae'mo,

Ala kava ne'mo Goti'a muki himamu'amo ali'niya vekamo aote vekamo aote vekamo aote vekamo mai'niye. Hogoteno mai'niyanageno hemeni'e'mo ne'maiyanageno henaga'amo maige maige huno maigiye, hu'a hu'nae.
9 Lole'e lole'e vaya'mogimo maige maige huno ne'maiya vekamo'a yagaino ne'apateya siate'mo fai mai'niya vekae'mo mono hute'a ala agi'amo amige agi'ale'mo ali'a asaga hu'a atege hao ke hege hu'a mono nehae. 10 Mono nehage'apae'mo tueti fo'a vayatama vaya'mogimo maige maige huno ne'maiya vekamo yagaino ne'apateya siate'mo mai'niya vekalefe'mo apago'ya fai'a asagau'a aite'apae'mo mono nehae. Apakaemo kame hu'a ae'a apakasete'a ali'naya kakolitamo ali'a asagi'a yagaino ne'apateya vekamo sia aulagale'mo yaga au'a male'nae. 11 Malete'apae'mo,

Ala kava nene, Muki ya'e vaya'e'mo alo hu'nane. Kahau'nigeka alo huteka afa'a maisaya ya'mo alika apami'nanage'a hanege maige nehae. Kagaemo ha le konali yakamo alige ala kagikamo alige kayamufakamo alige huka alisana vekamo mai'nane,
hu'a hu'nae.